係就係，唔係就唔係

啊媽以前成日話︰「係就係，唔係就唔係，唔好依依哦哦。 」雖然，從來啊媽都唔係有個樣講個樣，但都覺得用這句說話來掩飾都唔錯。

今日公司有人同我講，我地買個部彩色打印機，令到我地越買越多野，當時我腦中浮過幾個念頭。

第一，部打印機係我支持買的，咁係咪即係我唔岩？

第二，部打印機係有 Service Agreement 的，連炭粉都包，重有乜野我地要被迫買？

再詢問才發現，原來打印機出左個信息，說裝多餘炭粉的容器將會盛滿。當保養公司的技工到來檢查時，他說這個容器是需要換掉，而不是單單清除就可以，所以叫我地「order」一個新的。

事情就是這樣，我的問題是︰「究竟佢叫我地 order 個新的，還是買一個新的？」

原來那人只是轉述，找回當事人問清楚，才知道對方只是叫我地 order，而不是買。

其實事情到這裡已經很清楚，因為所有組件都是由保養公司負責的，如有需要時，我們是要致電對方「order」所要更換的組件，但…是免費的。

介於這個無稽的誤會有損我決策上超卓能力的聲譽，我決定給予這位武斷的同事一個低頭的機會。我問︰「咁即係要 order，而唔係買？」

當狗被迫到埋牆會跳，就連人被迫到無路唔叫都會有各樣的創意拋出黎。這位仁兄說︰「係要 order，但係唔洗比錢。」

到了這種無械可擊的地步，我亦唔想再為我的英明清白負出再多的唇舌。點解係無械可擊？讓我們細心睇睇。

當我問︰咁即係要 order，而唔係買？意指「要order」和「不用買」。

當佢答︰係要 order，但係唔洗比錢。意指「要order」但「不用比錢」。

正常的人都睇到，不用買同不用比錢係無分別的。只要他能夠找到千個與「買」類同意思的字句，他就可以有千個不同既答案。例如︰「係要 order，但係對方比錢。」又例如︰「係要 order，但係人地唔收錢。」千千萬萬，林林總總的答案，要用一個工作天的時間去處理，相信也有難度。到了詞窮時，重可以玩加插。就例如︰「係要 order，但係無人 order。」又例如︰「係要 order，但係唔知點解好似唔係唔得可以無事得閒搵事黎洽下咪係講下無乜所謂真係唔係比錢咁咪講到之咪買都唔係囉。」

可以有如此綿綿不絕的回應，其中變化比令孤沖的獨孤九劍有過之而無不及。面對其鋒利，又怎能不伏首稱臣說一句「無械可擊」呢？

「係就係，唔係就唔係。」掩飾唔到？唔緊要！係咪話「唔算唔係」，唔係咪話「唔能夠係」囉。